ბექა ბარჯაძე 38 წლის ფერმერია, რომელიც აგრარულ საქმიანობაში სულ რამდენიმე წელია, რაც ჩაერთო. ის პროფესიით არქიტექტორი/მშენებელია, მაგრამ პანდემიამ, როგორც ჩვენი ყველას, ასევე მისი ცხოვრებაც შეცვალა. რადიკალურად სხვა კუთხით წარიმართა ბექას საქმიანობა მას შემდეგ, რაც ქვემო ფონიჭალაში არსებულ მიწაზე, სადაც საწარმო უნდა აეშენებინა, საკუთარი ბიო სასათბურე მეურნეობა „ბოსტანი“-ის გაშენება დაიწყო. ამის მიზეზი ჯანსაღი პროდუქციის მოთხოვნა გახლდათ, როგორც თავისი ოჯახისთვის, ასევე გარშემომყოფებისთვისაც. მოთხოვნას მოყვა სურვილი, აეთვისებინა ახალი ჰობი, რომელიც მოგვიანებით აქცია ბიზნესად. მისი სასათბურე მეურნეობა „ბოსტანი“ მხოლოდ“ბიოაგრო“-ს ბიოსეტრიფიცირებულ პროდუქციას იყენებს. მიწის განაყოფიერებისთვის ამავე მეურნეობაში მზადდება კომპოსტი და პერიოდულად დაგეგმილი აქვთ სიდერაცია, რაც ძალიან მნიშვნელოვანია ნიადაგისთვის. ყოველივე ეს, რა თქმა უნდა ნიადაგის ნაყოფიერებაზე დადებითად აისახება და პროდუქცია ჯანსაღი ვითარდება და არ საჭიროებს არანაირ ქიმიურ ჩარევას. სუფთა და ბუნებრივად დამუშავებულ მიწაზე აქტიურად აწარმოებს სხვადასხვა ბოსტნეულ კულტურებს.
ამ ეტაპისთვის 7 სახეობა პომიდორი აქვს, ასევე ელოდება სამი სახეობის ცუკინს, იგივე ყაბაყს. ამასთან ერთად: ოთხი სახეობის კიტრს, სალათის ფურცელს, სტაფილოს, ჭარხალს, ბოლოკსა და ტკბილი წიწაკას იგივე (ბულგარული). ბოსტანში 2022 წელს დაგეგმილია მარწყვის წარმოებაც. ბექა თავის თავისუფალ დროსაც კი „ბოსტანში“ შვილებთან ერთად ერთად ატარებს. ბავშვებს ის ადგილი ძალიან მოსწონთ და კარგად ერთობიან. მეურნეობაში აქტიურად იტესტება ახალ ბოსტნეული კულტურები, რომლის სათესლე მასალაც მცირე რაოდენობით მეგობრების დახმარებით შვეიცარიიდან და ევროპის სხვადასხვა ქვეყნებიდან ჩამოაქვთ, რადგან საქართველოში ბიო სერტიფიცირებული სათესლე მასალის დეფიციტია და არც იშოვება. სატესტოდ მოყვანილმა კიტრმა, ბროკოლმა და ცუკინმა წარმატებული შედეგი გამოიღო, ამიტომაც ფერმერი გეგმავს, მათი წარმოებაც აქტიურად დაიწყოს. ბექა ძალიან ამბიციური და მშრომელი ფერმერია, რომელიც თავისი მიზნებისაკენ დაუღალავად მიიღწვის. მისი ფერმერობის ისტორია კი შეიძლება, ბევრისთვის ინსპირაციის წყაროც კი გახდეს.