არსებობს ასეთი ძველი ბერძნული სიბრძნე, რომელიც გვეუბნება: “მთელი სიცოცხლე უნდა იარო, რომ დანიშნულების წერტილამდე მიაღწიო” საოცარი მომენტია, რომ არსებობენ ადამიანები, რომლებიც მთელს ცხოვრებას აღმოჩენებში ატარებენ და ფარხმალს არასოდეს ყრიან. სწორედ ასეთია ჩვენი ფერმერი, თამარ თეთრუაშვილი. თამარი თავის პატარა საოჯახოს საწარმოს მეუღლესთან ერთად უძღვება. თეთრუაშვილების სახლიდან, როგორც წესი, ყოველთვის დიდი ჟრიამული გამოდის. თამარსა და მის მეუღლეს საქმე მართლაც ბევრი აქვთ: ისინი 4 შვილს ზრდიან, პარალელურად მსხვილფეხა საქონელს უვლიან და რძის პროდუქტებს აწარმოებენ. ეს ყოველივე წასაკითხად და დასაწერად იოლია, მაგრამ წარმოდგენა და იმის შეფასება, რასაც ეს ორი სიცოცხლითა და სიყვარულით სავსე ახალგაზრდა აკეთებს შეუძლებელია. თეთრუაშვილები ამ ყოველივეს დიდი სიმამაცითა და ენთუზიაზმით ხვდებიან. დროის მენეჯმენტიც იდეალურად აქვთ დაბალანსებული:

დილაობით, თამარი ბავშვებთანაა, საუზმეს უმზადეს, აცმევს-ახურავს და ბაღში უშვებს. მისი მეუღლე ვალერი ამ დროს საქონელთანაა და მათი სადგომის სისუფთავეზე ზრუნავს. ამას მოჰყვება ძროხისგან რძის მიღება და შემდეგ ამისგან თამარის ხელით ისეთი გემრიელი დოვლათის მომზადება როგორიცაა: ერბო, ახალი ხაჭო, კარაქი და ა.შ. თეთრუაშვილების ოჯახი ერთობის ძალიან კარგი მაგალითია. მათ იციან რა და როგორ უნდა გააკეთონ, პასუხისმგებლობები გადანაწილებული აქვთ, ერთმანეთს პატივს სცემენ და სწორედ საქმისადმი ასეთი გულიანი დამოკიდებულება მათ პროდუქტებზე დადებითად აისახება.